¿Qué ye una especie en peligru?

Los animales que tán en peligru n’Asturies denómense tamién “Fauna protexida” y clasifíquense en cuatro categoríes distintes en función del so grau de peligru de desapaición:

• En peligru d’estinción: son les que tienen una sobrevivencia poco probable si los factores causantes de la so situación actual siguen actuando.

Nel so orixe, el Catálogu Rexonal d’Especies Amenazaes de la Fauna Vertebrada del Principáu d’Asturies recoyía dientro d’esta categoría únicamente al osu pardu (Ursus arctos). Ensin embargu, n’ochobre de 2005 foi incluyíu tamién el gallu montés (Tetrao urogallus), dau l’incrementu del so descensu poblacional.

◦     Osu pardu (Ursus arctos).

◦     Gallu montés (Tetrao urogallus).

• Sensibles al camudamientu del so hábitat: son les especies que viven nun hábitat particularmente amenazáu, en grave regresión, fraccionáu o mui llimitáu.

Les cuatro especies incluyíes dientro d’esta categoría son:

◦     Llampariegu, llampareiro (Haematopus ostralegus).

◦     Picatueru, picaniellu testarroxa (Dendrocopos medius).

◦     Esperteyón (Myotis myotis).

◦     Esperteyón medianu (Myotis blythii).

• Vulnerables: son aquelles que cuerren el riesgu de pasar a les categoríes anteriores nun futuru inmediatu si los factores negativos qu’actúen sobre elles nun son correxíos.

Como especies vulnerables alcuéntrense catalogaes cinco especies:

◦     Algaraván (Numenius arquata).

◦     Aigla rial (Aquila chrysaetos).

◦     Xaronquina verde (Hyla arborea).

◦     Xaronca de ríu (Rana perezi).

◦     Llamprea (Petromyzon marinus).

• Especies d’interés especial: son aquelles qu’ensin tar contemplaes en nenguna de les categoríes precedentes, seyan merecedores d’una atención particular en función del so valor científicu, ecolóxicu, cultural o pola so singularidá.

Dientro d’esta categoría alcuéntrense catalogaes nueve especies:

◦     Paín (Hydrobates pelagicus).

◦     Cormorán moñudo (Phalacrocorax aristotelis).

◦     Andarina de ríu (Riparia riparia).

◦     Zapiquera (Neophron percnopterus).

◦     Ferre palomberu (Falco peregrinus).

◦     Ferriasacu (Accipiter gentilis).

◦     Esperteyu de cueves (Miniopterus schreibersii).

◦     Esperteyón d’oreya fisgada (Myotis emarginatus).

◦     Llóndriga, llondra (Lutra lutra).